”إخوان على نتنياهو... مظاهرة مرخصة من بن غفير ضد مصر في قلب تل أبيب؟ -فيديو

شوف البجاحة معقول يا جماعة الخير، اللي بيتظاهروا ضد مصر... فين؟ في تل أبيب! آه والله العظيم، في قلب "إسرائيل" وبيرفعوا علمها كمان! وبيقولك إنهم زعلانين إن مصر قافلة معبر رفح! طب يا عباقرة، ما تطلعوا تتظاهروا قدام اللي ضارب غزة بالطيران ومقفل عليها من كل ناحية؟ ولا المظاهرة المرخصة من بن غفير كانت أسهل وأوفر؟

برنامج الكلمة الخائنة

بصراحة كده، لو حد كان كاتب ده فيلم خيال علمي كنا قولنا عليه بيبالغ، بس إحنا فعلاً قدام حلقة من برنامج "الكاميرا الخاينة"، لأن مفيش تفسير غير إن دي حركة إخراج مش مصدق نفسه.

واحد فلسطيني طالع يقول عندي Error ومش قادر أفهم إزاي تتظاهر في تل أبيب ضد مصر؟ ده مش Error يا ابني، دي شاشة زرقة من بتاعة الويندوز زمان. اللي حصل ده لازمله update لعقل الناس اللي مفكرة نفسها بتدافع عن غزة وهي بتعمل إعلان مجاني للعدو الصهيوني.

كل ما أقول فلسطين.. أطلع أهاجم مصر!"

ولما نلاقي كمال الخطيب ورائد صلاح - بتوع الحركة الإسلامية "المحظورة" - واقفين قدام سفارة مصر وبيصوتوا، نقول يا صلاة النبي، هو إحنا في نكسة جديدة ولا إيه؟ ده حتى عبد الحليم كان يقول "أنا كل ما أقول التوبة يا بختي"... إنما الناس دي تقول "كل ما أقول فلسطين.. أطلع أهاجم مصر!"

"كيف تتحول من مقاوم إلى ممثل كومبارس في فيلم دعائي للكيان

وطبعًا لما تشوف شوية إخوان رافعين السبحة في إيد وعلم إسرائيل في التانية، تعرف إننا مش بس في زمن المسخ، إحنا في عرض خاص بعنوان: "كيف تتحول من مقاوم إلى ممثل كومبارس في فيلم دعائي للكيان".

والمفاجأة؟ المظاهرة دي كانت بتصريح رسمي! آه والله، قدموا طلب لبن غفير نفسه! يعني اللي بيقصف غزة وبيقولهم بالنص عايز أعمل إبادة، هو نفسه اللي بيديهم تصريح يتظاهروا ضد مصر! ده مش نفاق، ده انبطاح سياسي بإخراج صهيوني وتمثيل إخواني.

بدل ما يقفوا قدام وزارة الحرب الإسرائيلية، قرروا يهاجموا مصر

.الناس دي يا سادة مش بتدافع عن غزة، الناس دي بتلعب على دم غزة. وبدل ما يقفوا قدام وزارة الحرب الإسرائيلية، قرروا يهاجموا مصر اللي طول عمرها واقفة مع القضية.

بس خد بالك، الشعب المصري مش غبي، وكل ما يشوف حد من النوع ده بيطلع يتكلم عن فلسطين وهو قاعد في حضن الصهاينة، بيقوله: "اقعد يا موكوس".

في الآخر، مصر مش هتتهز من شوية تمثيليات، ومش هتبدل موقفها الشريف بسبب كام إخواني بيشتغل كومبارس في فيلم اسمه "التفريط في القضايا". إنما العار هيفضل مكتوب على وشوش الناس اللي خدت تصريح من عدوها عشان تهاجم أهلها.