واضح إن السياسة الدولية قررت تخلع البدلة الرسمية وترتدي جلابية “اللا معقول”، وتدخل رسميًا مرحلة “ما بعد الاستراتيجية”.. أو زي ما نقول بالمصري كده: مرحلة كيد النسا.
آه والله، إحنا مش بنهزر.. لما رئيس أقوى دولة في العالم يطلع في خطاب عالمي ويتكلم بالطريقة دي، يبقى لازم نسأل: إحنا في مؤتمر سياسي ولا حلقة برنامج ترند؟
لما السياسة تتحول لـ “حكايات قعدة ستات”
في مشهد صعب يتخيل حد يشوفه قبل كده، خرج الرئيس الامريكي خلال خطاب علني يتحدث فيه عن عن الرئيس الفرنسي ناكرون ليست من زاوية سياسية أو استراتيجية.. لكن من زاوية شخصية جدًا، قائلًا إن زوجته “بتضربه” وإنه “أخد لكمة ولسه بيتعافى منها”!
يعني إحنا قدام خطاب دولي ولا خناقة عائلية اتسربت بالغلط على المسرح؟
مش أول مرة.. “خارج النص” بقى هو النص
اللي متابع تصريحات ترامب عارف إن دي مش أول لقطة “خارج الكادر”.
قبل كده، سمعنا تصريحات أغرب، وصلت لاتهامات مهينة لزعماء، بكلام لا يليق حتى بجلسات خاصة، فما بالك بمنصة عالمية!
الفكرة هنا مش في التصريح نفسه..
الفكرة إن ده بقى نمط متكرر، وكأن “اللي خارج النص” هو بقى النص الرسمي في زمن ترامب
السياسة ولا الكوميديا السوداء؟
اللي بيحصل ده يخليك محتار:
- هل ده خطاب سياسي؟
- ولا فقرة ستاند أب كوميدي؟
- ولا “ترند” معمول مخصوص عشان يكسر الدنيا على السوشيال ميديا؟
بصراحة.. إحنا دخلنا مرحلة جديدة خالص، مرحلة السياسة فيها بقت أقرب للدراما منها للدبلوماسية ولكيد النسوان اقرب من الأستراتيجيات
: الموضوع أكبر من هزار
خلينا نضحك شوية.. بس نفهم الجد كمان.
اللي بيحصل ده مش مجرد تصريحات غريبة، ده انعكاس لتحول أعمق:
- تراجع قواعد الخطاب السياسي التقليدي
- تصاعد الشعبوية بشكل غير مسبوق
- استخدام “الإثارة” بدل الرسائل السياسية الواضحة
ببساطة:
السياسة بقت بتلعب على أعصاب الجمهور مش على عقولهم.
محتاجين علماء نفس.. مش محللين سياسيين
بصراحة، المشهد الحالي يخليك تفكر إن اللي محتاجين يفسروا اللي بيحصل مش بس خبراء سياسة..
لا، إحنا محتاجين:
- متخصصين في علم النفس
- وممكن كمان مباحث الآداب
لأن اللي بيتقال ساعات بيخرج عن كل قواعد السياسة والذوق العام.
الي اين يذهب العالم ؟
إحنا مش ضد الضحك.. ولا حتى السخرية،
بس لما السياسة العالمية تتحول لمساحة “كيد النسا” واللقطات الشخصية، يبقى لازم نقف ونسأل:
هو العالم رايح على فين؟
ولا يمكن الإجابة ببساطة:
العالم بقى “ترند”.. واللي يكسب هو الأكثر إثارة، مش الأكثر عقلانية.