محمد صبحي والسائق… موقف انتهى بلا إهانة
أنا شخصيًا معنديش أي اعتراض على الطريقة اللي اتعامل بيها الفنان محمد صبحي مع السواق بتاعه. الراجل واضح إنها مش أول مرة يشوف تقصير من السائق ومن حقه جدًا ينفعل وزي أي حد فين لما يحس إن شغله واقف على حد مش مركز بيتصرف. في الآخر هو أخد المفتاح وساق عربيته لا ضرب ولا شتم ولا أهان. خلاص، موقف وانتهى بين نجم وموظف متكاسل عن اداء وظيفته بالشكل المطلوب منه
إنما مشكلتي الحقيقية مش هنا…
مشكلتي في النرجسية اللي بقت فايحة حوالين أغلب الفنانين في مصر—النرجسية اللي بقت أكبر من موهبتهم، وأعلى من نجاحهم، وأبعد بكتير عن الناس اللي عملوهم نجوم من الأساس.
ليه الفنان عندنا أول ما يشوف كاميرا أو جمهور يطلع يجري؟
ليه لما حد بسيط يقوله: “ممكن صورة؟” يبصله من فوق لتحت كأنه بيشحت منه؟
ليه الصحفي اللي شغال ينقل أخبارهم للناس بيتعامل كأنه مزعج أو متطفل؟
المؤسف إن نفس الفنان ده… لو سافر بره، في نفس اللحظة اللي يمشي فيها على ريد كاربت، هتلاقيه بيضحك وواقف بالساعات يتصور ويكتب إهداءات على ورق ويرمي بوسات في الهوا. ليه؟
عشان هناك بيعرف إن احترام الجمهور جزء من الشغل… مش تفضّل شخصي.
التواضع… أرقى أشكال القوة
في الأوسكار بنشوف نجوم عالميين بيهربوا من البودي جاردز ويجروا جرى سريع علشان يقربوا من الناس بدون تدخل الجاردات
الممثل بيبقى فاهم إن الصورة اللي هيخدها مع طفل أو واحدة جاية من آخر الدنيا… دي اللحظة اللي هتفضل عايشة في قلبهم سنين.
وهو بيعمل كده وهو مبسوط، مش متكبّر.
لأنه واعي إن الشهرة مش ملكه… الشهرة ملك الناس اللي حبّته وصدّقت فيه وفتحت له الباب.
لكن هنا؟ وهنا بجد الكارثة…
الفنان بقى شايف إن الجمهور "أقل"، وإن مجرد اقتراب حد منه "إزعاج".
نسي إن النجاح مش سباق جري، ده ممر طويل فيه ناس واقفة على الجنبين، بتسقّف، بتدعم، وبتديك القوة تكمل.
نسي إن الابتسامة اللي هيتصور بيها مع حد، مش هتكلفه غير ثوانى معدوده لكن هتسعد قلب إنسان يوم كامل.
نسي إن التواضع مش نقطة ضعف… ده أرقى شكل من أشكال القوة.
احنا مش طالبين من الفنان يبقى صديق ولا يفتح بيته لحد.
إحنا عايزين بس إنسانية بسيطة… ابتسامة، صورة، كلمة لطيفة.
عايزين نرجع نشوف النجوم اللي بنحبهم وهم فاكرين إنهم جايين من وسطنا… مش بعيد عننا.
وللأسف…
في اللحظة اللي الفنان بيبعد فيها عن الناس، بيكون فعلاً بيبعد عن السبب الوحيد اللي خلاه نجم.
